Ferð á tónleika með stórtenórnum Jonas Kaufmann í Arena di Verona

Courtesy of Fondazione Arena di Verona. Photo: Gregor Hohenberg.
Tryggið ykkur sæti með því að senda okkur póst á sala@eldhusferdir.is eða hringið í síma 7779060.

HEIMSVIÐBURÐUR Í TÓNLISTARHEIMINUM – JONAS KAUFMANN Í ARENA DI VERONA í Ágúst 2021
 
Ágúst 2021, 7 gistinætur / 8 ferðadagar
Fararstjóri: Ágústa Sigrún Ágústsdóttir
 
„Jonas Kaufmann Gala Event“ er fyrsti viðburðurinn í tónleikaröð Arena di Verona sumarið 2020. Heimsviðburður sem enginn tónlistarunnandi má láta framhjá sér fara því þarna mun hinn heimsfrægi þýski tenór Jonas Kaufmann koma fram í fyrsta sinn í Arenunni, eða eins og hann segir sjálfur:
 
„Ég er ákaflega ánægður að geta tilkynnt frumraun mína í Verona, en þangað kom ég oft sem söngnemi og velti alltaf fyrir mér hvernig það væri að syngja fyrir framan allann áhorfendaskarann á þessum einstaka stað. Tækifærið virtist ekki í augnsýn en hefur nú loksins orðið að veruleika.“ Jonas Kaufmann
 
Mögnuð ítalíuferð þar sem áherslan er á „la dolce vita“ eða hið ljúfa líf og hápunkturinn er án efa stórsöngvarinn Jonas Kaufmann á galatónleikum í Arena di Verona. Flogið er til Milano Malpensa og þaðan er ekið að Gardavatninu þar sem gist er í bænum Desenzano del Garda í 5 nætur, en þar bjó okkar íslenski tenór Kristján Jóhannsson í áraraðir ásamt fjölskyldu sinni. Desenzano er heillandi bær og umvefur alla sem þangað koma sjarma sínum og hlýju. Ferðin liggur síðan upp til alpaborgarinnar Bolzano þar sem gist verður í 2 nætur. Flogið heim frá München.
FERÐALÝSING
 
Flug til Ítalíu – Desenzano del Garda

Brottför frá Keflavík kl. 13:55, mæting í Leifsstöð 2 – 3 tímum fyrir brottför. Lending á Milano Malpensa kl. 19:40 að staðartíma. Þaðan er ekið til bæjarins Desenzano del Garda þar sem gist verður næstu 5 næturnar. Hótelið er staðsett í 5 mínútna göngufæri frá miðbænum og einungis í 10 mínútna göngufæri frá baðströndinni í Desenzano.
Desenzano og vínsmökkun

Fyrripart dags er boðið upp á létta gönguferð um miðbæ Desenzano þar sem fararstjóri sýnir fólki helstu kennileiti og fer yfir sögu bæjarins. Síðla seinniparts er svo boðið upp á vínsmökkun og kvöldverð á heillandi stað í Pozzolengo sem er stutt frá Desenzano.
Ferjusigling á Gardavatninu

Þessum degi verður vel varið á vatninu. Siglt með ferju upp til bæjarins Garda. Þar er margt að sjá og um að gera að leyfa forvitninni að ráða för og þræða þröngar götur bæjarins og uppgötva eitt og annað áhugavert. Frá Garda er siglt með ferju niður til Sirmione, dásamlegur miðbærinn er staðsettur á Sirmione-tanganum. Þar er Scaligero-kastalinn, gömlu kirkjurnar, Grotte di Catullo og síðan er um að gera að fylgja fararstjóranum að húsi dívu gullára óperunnar, Maria Callas.
Desenzano – frjáls dagur fram eftir degi og glæsikvöldverður

Hér er frjáls dagur fram eftir degi. Seinnipartinn verður haldið til San Martino della Battaglia. Á leiðinni á staðinn verður sögð saga einnar mestu orrustu í Evrópu fyrir tíma heimsstyrjaldanna, en hún fór fram 24. júní 1859 og varð til þess að Ítalía var sameinuð í eitt ríki og Rauði krossinn var stofnaður. Litið við í litlu beinakapellunni og þau sem vilja geta farið upp turninn (64 m, um 1 km upp og niður og/eða kíkt á Rauðakrosssafnið á staðnum, kostar 7 €) sem stendur þarna á staðnum til minningar um orrustuna.
JONAS KAUFMANN Í ARENUNNI Í VERONA

Stórtenórinn Jonas Kaufmann þarf vart að kynna. Hann opnar hér „Gala Event“ tónleikaröðina í Arenunni árið 2020. Um heimsviðburð í heimi tónlistarinnar er að ræða þar sem stórtenórinn þreytir hér frumraun sína á sviði Arenunnar. Frá Desenzano er haldið til Verona, þar gefst kostur á því að rölta smá um miðbæ borgarinnar, fá sér snemmbúinn kvöldverð og svo kemur að stóru stundinni!!!
Haldið á vit ævintýranna!

Þennan dag verður farið frá Desenzano og upp til borgarinnar Bolzano í Suður Tíról og hópurinn leiddur á vit ævintýranna á leiðinni til Bolzano. Seinnipartinn er komið til Bolzano og farið á hótelið sem er ákaflega gott og vel staðsett í miðbænum.

Bolzano

Í Bolzano er margt að sjá og margt hægt að gera. Um morguninn er boðið upp á sérferð. Í henni er farið með kláfi upp á eitt af fjöllunum sem umkringja borgina, þar er svo farið með sveitalestinni sem er þarna upp á fjallinu og litið við á merkilegu býflugna- og hunangssafni. Í Bolzano er einnig að finna Ötzi, hina 5300 ára gömlu múmíu sem fannst fyrir tilviljun 1991.
Heimferð, farið frá Bolzano og upp til München

Nú er komið að því að kveðja Ítalíu. Farið frá Bolzano og upp til München þaðan sem flogið er kl. 17:30. Lending á Keflavíkurflugvelli kl. 19:25.

Fararstjóri er Ágústa Sigrún Ágústsdóttir

Ágústa hefur mannauðsstjórnun og markþjálfun að aðalstarfi en hún lauk meistaranámi í mannauðsstjórnun og vinnusálfræði frá Háskólanum í Reykjavík og er alþjóðlega ACC vottaður markþjálfi. Í frístundum sinnir hún fararstjórn og syngur. Águsta er menntaður leiðsögumaður frá Leiðsöguskóla Íslands og hefur um árabil unnið við fararstjórn á Ítalíu, Króatíu og Slóveníu sem og við að leiðsegja ítölsku- og enskumælandi ferðamönnum um Ísland. Hún er einnig með bakgrunn úr listgreinum, er menntuð söngkona og söngkennari og hefur tekið þátt í sviðsuppfærslum m.a í Íslensku óperunni og víðar og gefið út geisladiska. Ágústa talar bæði ensku og ítölsku.
Verð á mann í tvíbýli frá 230.000 kr
Aukagjald f. einbýli frá 26.000 kr. (takmarkað framboð)
 
Innifalið:
  • 8 daga ferð (7 gistinætur)
  • flug með Icelandair til Milano Malpensa og heim frá München, innif. 23 kg taska, 10 kg handfarangur, skattar og gjöld
  • gisting í tvíbýli m. morgunverði í, standard/classic herbergi á 3 stjörnu hótelum (sjá undantekningu v. einstaklingsherb.):
          - 5 nætur Desenzano del Garda
          - 2 nætur Bolzano
  • rútuferðir til og frá flugvelli á komu- og brottfarardegi og í eins og kemur fram í ferðalýsingu
  • 2 kvöldverðir:
         - kvöldverður með vínsmökkun, drykkir innifaldir
         - margrétta kvöldverður „alla italiana“, drykkir innifaldir
  • sigling á Gardavatninu, dagsferð m. fararstjórn, innif. sigling á milli bæja.
  • tónleikar með Jonas Kaufmann  í Arenunni í Verona (aðgangseyrir, rúta og fararstjórn)
  • allt ferðaskipulag
  • íslensk fararstjórn, íslensku-, ítölsku- og enskumælandi fararstjóri
 
Ekki innifalið:
  • almenningssamgöngur nema annað sé tekið fram (kláfar, ferjur, lestir, strætó o.þ.h. samgöngur)
  • aðgangseyrir á söfn nema annað sé tekið fram
  • kvöldverðir og hádegisverðir nema það sem tekið er fram í inniföldu
  • þjórfé
  • allt annað sem ekki er tekið fram sem innifalið                                                             
ATHUGIÐ
Ef til þess kemur að fresta verði tónleikum Jonas Kaufmann vegna veður þá verða þeir fluttir yfir á mánudagskvöldið 29. júní og áskilja Eldhúsferðir sér rétt til þess að breyta ferðatilhögun mánudagsins í samræmi við þá breytingu viðskiptavinum sínum til hagsbóta.

Um tónleikana, miða á tónleikana, endurgreiðslu og allt er að Arena di Verona snýr gilda skilmálar Arena di Verona sem hægt er að nálgast á heimasíðu Arena di Verona.
Hægt er að lesa þá skilmála með því að smella HÉR.